6-njy iýulda ýurdumyzyň demirgazyk sebitiniň ylym-bilim merkezi bolan Türkmen oba hojalyk institutynyň binalar toplumynda halkara ekologiýa syýasatyny we durnukly ösüşi wagyz edýän medeni-ekologiki çäreleriň çäklerinde uly dabaralara beslenen “Tebigatymyzy bilelikde goralyň!” atly ekologiki forum geçirildi.

Möhüm çäre ÝUNESKO-nyň Bütindünýä bilimi ekologiýalaşdyrmak syýasatyny hem-de ýurdumyzda galyndysyz jemgyýeti ösdürmek, daşky gurşawy aýawly saklamak boýunça durmuşa geçirilýän döwlet syýasatyny giňden wagyz etmek maksady bilen gurnaldy. Ýokary guramaçylyk ýagdaýynda geçen bu forumy ÝUNESKO-nyň işleri barada Türkmenistanyň Milli toparynyň Sekretariatynyň, Türkmenistanyň Bilim ministrliginiň hem-de Türkmen oba hojalyk institutynyň bilelikde gurnamagynda amala aşyryldy.

Ekologiki forumyň açylyş dabarasynyň öňisyrasynda, institutyň foýesinde gurnalan “Tebigatymyzy bilelikde goralyň!” atly giň gerimli ekologiki sergi gatnaşyjylarda uly täsir galdyrdy. Sergi ÝUNESKO Klublarynyň we Assosirlenen mekdepleriniň ýolbaşçylarydyr jogapkär mugallymlary tarapyndan ýörite taýýarlanyp, onda tebigaty goramak, ekologiki durnuklylyk, galyndysyz önümçilik we dermanlyk ösümlikleriň ähmiýeti baradaky gymmatly maglumatlar, talyplaryň ylmy-taslama işleri hem-de görkezme gollanmalary ýerleşdirildi.

Sergiden soňra, institutyň mejlisler zalynda degişli maslahat öz işine başlady. Maslahata Türkmen oba hojalyk institutynyň mugallymy, “Daşky gurşawy goramak – durnukly ösüşiň möhüm konsepsiýasy” atly ÝUNESKO Klubynyň başlygy Selbi Meredowa moderatorlyk etdi.

Çäräniň açylyşynda Türkmen oba hojalyk institutynyň rektory Döwlet Ýolow gutlag sözi bilen çykyp, ýurdumyzda daşky gurşawy goramak, suw we toprak serişdelerini aýawly saklamak hem-de oba hojalygyny ekologiki taýdan arassa usullar bilen ösdürmek ugrunda alnyp barylýan işler barada giňişleýin durup geçdi.

Maslahatyň dowamynda ýurdumyzyň abraýly ýokary okuw mekdepleriniň, ylmy edaralarynyň wekilleriniň we ÝUNESKO klublarynyň we kafedralarynyň wekilleriniň giň mazmunly çykyşlary diňlenildi. Çykyşlarda ekologiki bilim, parahatçylyk medeniýeti we milli mirasy gorap saklamagyň özara baglanyşygy ylmy esasda seljerildi. Hususan-da:

ÝUNESKO-nyň işleri barada Türkmenistanyň Milli toparynyň jogapkär sekretary, Türkmenistanyň Gahrymany Çynar Rüstemowa öz çykyşynda Türkmenistanyň we ÝUNESKO-nyň arasyndaky strategik hyzmatdaşlygyň durnukly ösüş maksatlaryna ýetmekdäki möhüm ornuny aýratyn belledi.

Magtymguly adyndaky Türkmen döwlet uniwersitetiniň uly mugallymy, “Medeni miras: geçmişden geljege” ÝUNESKO kafedrasynyň müdiri Bike Diwangulyýewa medeni we taryhy mirasy goramagyň ekologiki aň-bilim bilen utgaşmagynyň ähmiýetine ünsi çekdi.

TÝA-nyň Halkara ylmy-tehnologiýa parkynyň kiçi ylmy işgäri Aman Pirmedow ekologiýa meselelerini çözmekde we "Sanly ylym" ugrunda innowasion tehnologiýalaryň orny barada durup geçdi.

Şeýle-de çärede Döwletmämmet Azady adyndaky Türkmen milli dünýä dilleri institutynyň, Türkmenistanyň Daşary işler ministrliginiň Halkara gatnaşyklary institutynyň, Myrat Garryýew adyndaky Türkmenistanyň döwlet lukmançylyk uniwersitetiniň, Aba Annaýew adyndaky Halkara atçylyk akademiýasynyň hem-de Halkara ynsanperwer ylymlary we ösüş uniwersitetiniň ÝUNESKO klublarynyň ýolbaşçylarydyr wekilleri dünýä dillerinde çykyş etmek bilen tebigatymyzy bilelikde goramak üçin ajaýyň we uly netijeleri berjek tekliplerini aýtdylar.

Forumyň maksatnamasynyň iň täsirli we ähmiýetli bölekleriniň biri hem gatnaşyjylar üçin guralan taryhy-medeni gezelenç boldy. Forumyň myhmanlary we wekilleri 2005-nji ýylda ÝUNESKO-nyň Bütindünýä mirasynyň sanawyna girizilen hem-de adamzat siwilizasiýasynyň iň gadymy ojaklarynyň biri bolan Köneürgenç taryhy-medeni ýadygärlikler toplumyna baryp gördüler.

Gezelenjiň dowamynda gatnaşyjylar Gündogaryň binagärlik sungatynyň gaýtalanmajak nusgalary bolan Gutlug Temuryň minarasyny, Törebeg hanymyň, Il Arslanyň we Soltan Tekeşiň aramgähleridäki üýtgeşik gurluşyk aýratynlyklaryny uly gyzyklanma bilen synladylar. ÝUNESKO-nyň goragynda duran bu taryhy gymmatlyklar taryhyň dowamynda türkmen halkynyň tebigat we daşky gurşaw bilen sazlaşykly ýaşap, medeniýetiň we ylmyň beýik nusgalaryny döredendiginiň aýdyň subutnamasy hökmünde ýene bir gezek dünýä jemgyýetçiliginiň ünsüni çekdi.

“Tebigatymyzy bilelikde goralyň!” atly forum, taryhy köklerimize daýanyp, geljekki nesillere arassa we durnukly dünýäni we tebigety galdyrmak baradaky asylly maksatlary dabaralandyryp, ýokary ruhubelentlik ýagdaýynda jemlendi.